Dumonda d’approvar la concessiun pertutgant la permissiun da furnir dapli aua per ennavar, Ovra electrica Bargaus, Flims Electric SA
Exposiziun publica dals 31 da fanadur 2026 fin ils 31 d’avust 2026 tenor ils art. 52 ss. da la Lescha davart il dretg da las auas dal chantun Grischun (LDAG; DG 810.100).
Sa basond sin concessiuns da las vischnancas da Laax e Sagogn gestiunescha la Flims Electric SA (FE) l’ovra electrica Bargaus che utilisescha l’aua da l’Uaul da Mulin. La FE vul furnir a l’Arena Alva SA dapli aua per ennavar ed augmentar la cessiun d’aua dad oz maximalmain 75 000 m3 sin nov maximalmain 300 000 m3 per onn. L’augment sto vegnir approvà da la Regenza e sto vegnir tractada tuttina sco in’approvaziun da la concessiun.
Cun la dumonda dals 15 da zercladur 2026 vegn dumandà d’approvar l’adattaziun da la concessiun (coordinaziun e concentraziun da las proceduras tenor l’art. 55 LDAG).
La dumonda d’approvaziun dal project menziunà en il titel è exponida publicamain en il center administrativ Sinergia, Ringstrasse 10, 7001 Cuira, sco er en las vischnancas da Laax e Sagogn. Ils documents stattan ultra da quai er a disposiziun en furma electronica sin la pagina d’internet da l’Uffizi d’energia e da traffic dal Grischun sut la rubrica «Actualitads».
Tgi ch’è pertutgà da l’exposiziun e po far valair in interess degn da vegnir protegì ch’il project vegnia realisà, impedì u midà (art. 54 LDAG), ha il dretg da far protesta cunter il project, e quai en scrit e cun ina curta motivaziun. Il dretg da far protesta ha plinavant, tgi ch’è autorisà tenor il dretg federal da far quai.
Las protestas ston vegnir inoltradas entaifer il termin d’exposiziun al Departament d’infrastructura, energia e mobilitad dal Grischun, Ringstrasse 10, 7001 Cuira.
Sagogn, 31-07-2026 Uffeci d’energia e traffic dil Grischun