Dumonda d’approbaziun dalla concessiun per il project «Conduct da transmissiun Lumnezia» dallas Ovras electricas Zervreila SA (supplement tier la dumonda d’appro-baziun dalla concessiun dils 25 da zercladur 2012), vischnauncas da Panaduz, Flem, Lumnezia, Val Stussavgia, Schluein, Tumein, Trin, Val S. Pieder, Ilanz/Glion e Sagogn
Las Ovras electricas Zervreila SA (OEZ) e las vischnauncas concessiunaras dumondan l’approbaziun dalla concessiun concernent la realisaziun dil project «Conduct da transmissiun Lumnezia». Las OEZ e las vischnauncas concessiunaras dumondan da puder cuntinuar cun la procedura d’approbaziun dalla concessiun tenor la dumonda dils 25 da zercladur 2012 (el senn dalla decisiun da refusa dil Tribunal federal dils 12 d’october 2016; 1C_526/2015 ed 1C_528/2015 = DTF 142 II 517).
Cun la dumonda d’approbaziun dalla concessiun dils 15 d’october 2025 vegnan dumandadas l’approbaziun dalla concessiun sco era tut las permissiuns necessarias per realisar il project (coordinaziun e concentraziun dalla procedura tenor l’art. 55 LDAG).
Temps d’exposiziun e loghens d’exposiziun:
L’exposiziun publica ha liug dils 22 da schaner 2026 fin ils 20 da fevrer 2026, tenor ils art. 52 ss. dalla Lescha davart il dretg dallas auas dil cantun Grischun (LDAG; DG 810.100).
La dumonda d’approbaziun dil project menziunau el tetel ei exponida publicamein el center administrativ Sinergia, Ringstrasse 10, 7001 Cuera (s’annunziar tier la recepziun, 081 257 50 55). Dils documents d’exposiziun pon ins prender envesta duront las uras da biro ufficialas. Ils documents da dumonda ein plinavon exponi ellas vischnauncas da Panaduz, Flem, Lumnezia, Val Stussavgia, Schluein, Tumein, Trin, Val S. Pieder, Ilanz/Glion e Sagogn.
Ils documents stattan ultra da quei era a disposiziun en fuorma electronica sin la pagina d’internet da l’Uffici d’energia e da traffic dil Grischun sut la rubrica «Aktuelles».
Exposiziun coordinada cun adattaziun dil Plan directiv «Conduct da transmissiun Lumnezia»
Il supplement dalla concessiun vegn exponius publicamein en coordinaziun cun l’exposiziun publica dil Plan directiv (art. 4 dalla Lescha federala davart la planisaziun dil territori [Lescha davart la planisaziun dil territori, LPT; CS 700] ed art. 7 da l’Ordinaziun davart la planisaziun dil territori per il cantun Grischun [OPTGR; DG 801.110]). Ils documents d’exposiziun pon vegnir consultai sin la pagina d’internet da l’Uffeci per il svilup dil territori (www.are.gr.ch sut «Actualitads» ed «Exposiziun publica»). Analogamein alla dumonda d’approbaziun dalla concessiun ein ils documents stampai medemamein exponi egl edifeci administrativ Sinergia ed ellas vischnauncas numnadas cheu survart.
Protestas a scret
Tgi ch’ei pertuccaus da l’exposiziun e po far valer in interess dign da vegnir protegius ch’il project vegn realisaus, impedius ni midaus (art. 53 en cumbinaziun cun l’art. 54 LDAG), ha il dretg da far protesta encunter il project, e quei a scret e cun ina cuorta motivaziun. Il dretg da far protesta ha plinavon, tgi ch’ei autorisaus tenor il dretg federal da far quei.
Las protestas a scret sin pupi ston vegnir inoltradas enteifer il termin d’exposiziun fin il pli tard ils 20 da fevrer 2026 (bul postal) al Departament d’infrastructura, energia e mobilitad dil Grischun, Ringstrasse 10, 7001 Cuera.
Sagogn, 23-01-2026 Departament d’infrastructura, energia e mobilitad dil Grischun