Revista ed engraziament: Sagogn patertgar vinavon – Perspectivas per nies vitg
L’occurrenza d’informaziun e l’exposiziun «Ustria sil Plaz & Plaz Sutprei – in liug, biaras ideas» ein fruntadas la davosa fin d’jamna sin grond interess. Rodund 160 persunas han visitau l’informaziun il venderdis sera, mintgamai varga 60 l’exposiziun la sonda e dumengia. Leutier ein biars interessants discuors davart igl avegnir da nies center dil vitg naschi.
La presentaziun, ina survesta da tuttas lavurs da bachelor, l’analisa dil vitg, ina posiziun dalla suprastonza communala ed ulteriuras informaziuns ein disponiblas sin nossa pagina-web. Ils videos lessen nus bugen medemamein metter a disposiziun. Ord motivs da dretg d’autur ei la publicaziun deplorablamain buc pusseivla, perquei ch’ ella cuntegn per part musica ed auters cuntegns schurmegiai.
La suprastonza communala engrazia cordialmein als students e responsabels dalla SAS Grischun, als proprietaris sco era a tuttas visitadras e tuts visitaders per lur interess ed il brat constructiv.
Sagogn, 06.11.2026
Suprastonza communala Sagogn